रिसर्च अंतर्गत वर्षभरात आठ ते दहा अभ्यास वृत्ती दिल्या जातील, त्यासाठी सात आठ लाख रुपये खर्च येईल. ट्रेनिंग अंतर्गत सहा कार्यशाळा वर्षभरात घेतल्या तर साधारणतः दहा लाख रुपये खर्च येईल. अन्य खर्च पाच सहा लाख रुपये होईल. असा एकूण 25 लाख रुपये खर्च अपेक्षित आहे. यातील काही वाटा व्यक्तिगत देणग्यामधून मिळेल, काही CSR मधून मिळवता येईल. अशा कामासाठी देणग्या देण्यास लोक जास्त उत्सुक असतात, असा आमचा अनुभव आहे.

वस्तुस्थिती अशी आहे की, मागील चार पाच वर्षांत दरवर्षी साप्ताहिक व प्रकाशन विभागातून 10 लाख रुपये तरी असा खर्च करत आलो आहोत. तो खर्च यापुढे रिसर्च अँड ट्रेनिंग सेंटर या विभागातून होईल. उदा . विशेषांक , काही लेखमाला, अनुवाद इत्यादी. म्हणजे आणखी साधारणतः 15 लाख रुपये वाढीव तरतूद करावी लागेल. ती करता येणे आपल्याला साधनाचे वाचक, हितचिंतक यांचा बळावर करता येणे अवघड जाणार नाही.

रिसर्च अँड ट्रेनिंग सेंटर साठी एक त्रिस्तरीय समिती असेल. अध्यक्ष म्हणून सुरेश गोरे तर निमंत्रक म्हणून साधनाचे संपादक विनोद शिरसाठ हे दोघे नियोजन आराखडा व अंतिम निर्णय प्रक्रिया हे काम पाहणार. मागील पाच-सहा वर्षे सुरेश गोरे यांनी साधनाच्या विविध उपक्रमात वेगवेगळ्या प्रकारे सहभाग घेतला. पण साप्ताहिक व प्रकाशन यांचा दर्जा वाढावा, नवे विषय अजेंड्यावर यावेत , सर्व आघाड्यांवर गुणात्मक आणि संख्यात्मक वाढ व्हावी यासाठी त्यांची तळमळ आणि समज खूपच वरच्या दर्जाची आहे. त्यांचे काम जरी मुख्यतः रसायनशास्त्र क्षेत्रातील असले तरी, त्यांचे सामाजिक व राजकीय आकलन उत्तम आहे. मागील पाच सहा वर्षात आम्ही वारंवार भेटलो आहोत, एकत्रितपणे काही वेळा काम केले आहे. विशेषतः मागील दोन वर्षांतील अभ्यासवृत्तीसाठी. त्यांची आणि आमची विचारप्रक्रिया व ध्येय धोरणे यात कमालीचे साम्य आहे.

प्रत्यक्ष कार्यशाळा घडवणे, अभ्यासवृत्ती निवड प्रक्रियेचे व्यवस्थापन करणे, सर्व संबंधितांशी संवाद संपर्क करणे, पत्रव्यवहार करणे, तांत्रिक बाजू सांभाळणे, आर्थिक व्यवहार सुरळीत होतील याची दक्षता घेणे, प्रत्यक्ष हॉलवर भोजन व प्रवास निवास ही व्यवस्था पाहणे, सोशल मीडिया हाताळणे इत्यादी कामासाठी साधनाचे कार्यालयीन सहकारी लागणार आहेत. त्यासाठी सुदाम सानप व जयदीप कर्णिक हे दोघे सध्या अर्ध वेळ उपलब्ध करता येतील. सुदाम मागील सात वर्षांपासून साधनांशी जोडलेला आहे, अभ्यास वृत्तीच्या व अन्य कार्यक्रमांच्या संयोजनात तो आहे . शिवाय तो डिजिटल विभागाचा मुख्य मुख्य समन्वयक आहे. त्याचबरोबर जयदीप कर्णिक हे इंजिनियर साधनाशी मागील काही महिन्यापासून स्वयंसेवी पद्धतीने कार्यरत आहेत. गेली अनेक वर्षे ते साधनाचे वाचक आहेत. त्यांनी स्वेच्छा निवृत्ती घेतलली आहे. त्यांना लेखनाचे अंग आहे, वाचन चांगले आहे. ते रिसर्च अँड ट्रेनिंग सेंटरला अर्ध्याहून अधिक वेळ देऊ शकतात. तिसरा एक सहकारी लवकरच जॉईन करून घेणार आहोत.

नियोजन व निर्णय यासाठी अध्यक्ष सुरेश गोरे आणि साधनाचे संपादक, तर प्रत्यक्ष अंमलबजावणीसाठी साधनाचे तीन सहकारी असे चार-पाच लोक या सेंटरचे आधारस्तंभ असतील. मात्र या दोन स्तरांच्या मध्ये सल्लागारांच्या दोन टीम असतील. एक ज्येष्ठांचे सल्लागार मंडळ, त्यात विविध क्षेत्रांतील तीन चार तज्ञ असतील. तीन चार युवा सल्लागार (30 ते 40 या वयोगटातील ) असतील पुरेसा अभ्यास व अनुभव आणि निश्चित व निर्णयात्मक भूमिका असणारे हे लोक असतील. साधना साप्ताहिकाच्या संपादक मंडळातील सदस्यांची गरजेनुसार मदत घेतली जाईल. शिवाय, विविध क्षेत्रांतील मान्यवरांचा सहभाग वेळोवेळी घेतला जाईल