डिजिटल अर्काईव्ह (2008 - 2022)

महात्मा गांधी म्हणजे ‘मिथ’ 
चर्चिल म्हणजे ‘फिक्शन’ 
असं आज सांगणारी उगवती पिढी उद्या कदाचित म्हणेल 
‘बाबा आमटे, ए नेम गिव्हन टू द इंडियन सायक्लोन 
विच क्रिएटेड ए न्यू सिव्हिलायझेशन!’
या उत्तराला परीक्षेत मार्क शून्य मिळतील; 
पण खरं उत्तर तेच असेल.

हरिकेन कॅटरिना, रिटा, जोन्स... 
वादळांना आणि चक्रीवादळांनाही 
हल्ली म्हणे नावं दिली जातात!
क्षणार्धात तिन्ही लोक व्यापणाऱ्या 
अन् होत्याचं नव्हतं करून टाकणाऱ्या 
प्रलयंकर चक्रीवादळाचे नामकरण करतात

000

एक वादळ असंच भारतात आलं होतं 
पण ते नव्हत्याचं आहे करणारं शुभंकर वादळ होतं 
नापीक जमिनीला स्वप्नांचा गर्भ देणारं आणि 
निद्रिस्त प्रेतांना नवा प्राण देणारं वादळ होतं ते 
या वादळानं दिला असा जोरदार तडाखा 
की मुळापासून उखडली गेली शक्तिशाली सिंहासनं 
उन्मळून पडल्या जगण्याच्या जुनाट धारणा 
नि स्वप्नांची मशागत करू लागली निर्जीव मनं 
क्षण-प्रहर गेले, वर्षे-दशके लोटली 
तरी हा झंझावात मात्र थांबला नाही 
अंधाराच्या मस्तवाल सैनिकांना उद्ध्वस्त करत 
काळोखातील रातकिड्यांना पायदळी कुस्करत 
या वादळानं ध्वस्त केल्या निराशेच्या गर्ता 
बकाल भुईनं पोटात घेतलेला हरेक झाला कर्ता 
दिमाखात उभे ठाकलेले चिरेबंदी वाडे कोसळले 
काजव्यांनी प्रथमच मग शक्तिप्रदर्शन केले 
मिणमिणणाऱ्या पणत्यांची तेव्हा मशाल झाली 
रात्रीच्या गर्भातील पहाट अशी जन्मा आली!

000

अचेतनावर सचेतनाचा आरोप करणाऱ्या
या चेतनगुणोक्तीनं साजरे केले सृजनाचे सोहळे
त्याच्या एका स्पर्शासरशी फुलले आनंदाचे मळे 
पांगळ्यांना हात द्याया सरसावले बलदंड बाहू 
निर्मितीच्या मुक्त गंगा लागल्या मातीत वाहू 
बदलवून टाकला अवघा इतिहास या वादळानं 
आणि फेरमांडणी करून नवा भूगोल जन्माला घातला 
या वादळी हल्ल्याने भिंतींना पडले तडे 
आणि नवे सेतू राहिले उभे 
कोंडलेल्या वादळाच्या अनिवार लाटांमधून निघाल्या 
नव्या वाटा... नव्या विटा

000

अशी वादळं जन्माला येतात; पण 
ती नाहीशी कधीच होत नसतात 
कारण ती देतात जन्म नवनव्या वादळांना 
ती देतात प्राण मनाच्या वस्तीतील स्वप्नांना 
असं एक वादळ माणसाळलं अन् 
भारतीयांनी त्याला नाव दिलं 
बाबा आमटे!
महात्मा गांधी म्हणजे ‘मिथ’ 
चर्चिल म्हणजे ‘फिक्शन’ 
असं आज सांगणारी उगवती पिढी उद्या कदाचित म्हणेल 
‘बाबा आमटे, ए नेम गिव्हन टू द इंडियन सायक्लोन 
विच क्रिएटेड ए न्यू सिव्हिलायझेशन!’
या उत्तराला परीक्षेत मार्क शून्य मिळतील; 
पण खरं उत्तर तेच असेल.

Tags: weeklysadhana Sadhanasaptahik Sadhana विकलीसाधना साधना साधनासाप्ताहिक

संजय आवटे
sunjaysawate@gmail.com

पत्रकार 




साधना साप्ताहिकाचे वर्गणीदार व्हा...
वरील QR कोड स्कॅन अथवा UPI आयडीचा वापर करून आपण वर्गणीदार होऊ शकता. वार्षिक, द्वैवार्षिक व त्रैवार्षिक वर्गणी अनुक्रमे 900, 1800, 2700 रुपये आहे. वर्गणीची रक्कम ट्रान्सफर केल्यानंतर आपले नाव, पत्ता, फ़ोन नंबर, इमेल इत्यादी तपशील
020-24451724,7028257757 या क्रमांकावर फोन, SMS किंवा Whatsapp करून कळवणे आवश्यक आहे.
weeklysadhana@gmail.com

प्रतिक्रिया द्या


लोकप्रिय लेख 2008-2022

सर्व पहा

लोकप्रिय लेख 1978-2007

सर्व पहा

जाहिरात

साधना प्रकाशनाची पुस्तके